Këtë të hënë, Dritan Rexhepi nuk u paraqit në seancën ndaj tij dhe të bashkëpandehurve, të akuzuar për rrëmbimin dhe zhdukjen e Jan Prengës.
Përmes avokates së tij, Joana Qeleshi, Rexhepi e arsyetoi mungesën me faktin se për të qenë në seancë, do të duhej të shoqërohej që të premten nga paraburgimi i Fierit në paraburgimin 313 në Tiranë.
SPAK paraqiti provat shkresore para gjykatës. Mes tyre, aktet e këqyrjes së vendit të ngjarjes dhe akt-ekspertimi që tregon përputhshmërinë e ADN-së të përftuar nga njollat e gjakut të vendngjarjes me ato të nënës së Jan Prengës.
Prokurorët kanë pohuar se përmes pamjeve filmike në disa biznese është dokumentuar itinerari i ndjekur nga automjeti ku është futur me forcë Jan Prenga. Përmes pamjeve është provuar se viktima është mbajtur nën vëzhgim për disa ditë përpara ngjarjes, ku automjeti “Land Rover” i të dyshuarve ka ndjekur automjetin e viktimës në 15, 16 dhe 17 janar.