Dje (e mërkurë) kur Skënder Gjinushit i mbaroi mandati në krye të Akademisë së Shkencave, anëtarët e PS-së të Komisionit për Edukimin në Kuvendin e Shqipërisë u mblodhën dhe brenda 4 minutash votuan projektligjin që i lejon Gjinushit një mandat i dytë në krye të këtij institucioni.
Gjatë fjalës së saj në foltoren e Kuvendit, deputetja e PD-së Ina Zhupa tha se nuk mund të futet në rend dite një projektligj që ka ardhur nga një mbledhje që është zhvilluar në mënyrë të paligjshme. Po ashtu ajo i tha maxhorancës që Gjinushin ta bëjnë kryetar Kuvendi.
“Një mbledhje 4 minuta e njoftuar në WhatsApp, jashtë rregullave, e protokolluar në orën 2, e votuar, dhe ju nuk mund të fusni në rend dite një projektligj që ka kaluar me mbledhje të paligjshme. Mbledhjet e deputetëve që mbahen pa u thirrur nuk sjellin asnjë pasojë dhe ne nuk mund të zhytemi në paligjshmëri dhe të fusim një produkt që ka ardhur në një mbledhje të paligjshme. Keni frikë të përdorni elektronikën. Unë kam qenë në orën 11, aty nuk ka pasur mbledhje. Janë mbledhur kaçakshe në orën 11 e 25.
Gjinushin merreni bëjeni kryetar parlamenti sepse me të njëjtën arrogancë do të qeverisë, madje kryeministër e shkuar kryeministri. Turp që ju pranoni që një tempull i dijes siç është Akademia e Shkencave është pa një kryetar të ligjshëm dhe ju sot ndërhyni në garë dhe të ketë mundësi Gjinushi të marrë mandat të dytë. Kjo është e paparanushme se si një parlament ndërhyn për ambiciet e një individi. Këtë projektligj nuk mund ta kaloni se nuk ka pasur një mbledhje të rregullt për të”,-tha Zhupa.