Deputetja demokrate, Ina Zhupa ka zbuluar detaje të reja rreth shkeljeve që sipas saj qeveria po bën në dhënien me koncesion të Parkut Kombëtar të Butrintit. Zhupa tha se shteti shqiptar nuk ka më rol parësor në këtë koncesion duke qenë i përfaqësuar vetëm nga drejtoresha e Institutit të Trashëgimisë Kulturore, Klesta Qirici.
Duke qenë se Elva Margariti u shkarkua nga posti i ministres së Kulturës pas krijimit të ministrisë së re, deputetja nënvizoi se shteti shqiptar ka mbetur i nënpërfaqësuar në bordin e menaxhimit të këtij koncesioni, duke mbetur vetëm me 1 përfaqësues nga 5 që ka bordi në total.
Zhupa e cila bëri me dije se sot në Gjykatën Kushtetuese po mbahet një seancë e riçelur, tha se nëse ky institucion nuk do të jepte zgjidhje, atëherë çështja do të çohet në SPAK.
“Kjo është një çështje që nëse nuk merr zgjidhje nga Kushtetuesja, për shkeljet penale do të shkojë në SPAK. Unë kam vënë provë Gjykatën Kushtetuese, sepse kjo nuk është çështje politike, por një cështje e identitetit kombëtar dhe historisë së saj. Dhe nëse nuk arrin që edhe për këtë çështje, të ngrihet në nivelin e duhur, atëherë nuk ka më arsye se pse të ekzistojë Kushtetuesja në vend”, ka thënë Zhupa para gazetarëve.