Nënstacioni elektrik në Draçin të Shkodrës është përfshirë nga flakët ditën e sotme. Si pasojë Shkodra ka mbetur pa energji elektrike.
Gazetari i Vizion Plus, Bepin Kolvata mëson se zjarri ka përfshirë disa kabina elektrike. Gjithashtu nga flakët është përfshirë edhe salla e komandimit të nënstacionit.
Tre zjarrfikëse ndodhen në vendin e ngjarjes dhe po punojnë për shuarjen e zjarrit.
“Rreth orës 11:30, dyshohet se për shkak të shkëndijës elektrike ka rënë zjarr në kabinën elektrike të një pallati në rrugën “Vëllezërit Frashëri”. Shkëndija në kabinë ka shkaktuar masë elektrike në nënstacionin elektrik në vendin e quajtur “Draçin”. Si pasojë, në nënstacion është ndezur zjarr dhe përhapja e flakëve ka shkaktuar zjarr dhe në magazinën në pronësi të shtetases R. L., 34 vjeçe, objekt që ndodhet në afërsi të nënstacionit. Nga zjarret ka vetëm dëme materiale. Shërbimet e Policisë po bashkëpunojnë me zjarrfikësit, për të mundësuar shuarjen e zjarreve”, njoftoi policia.
Ndërkaq, grupi hetimor, nën drejtimin e prokurorit, po heton për të dokumentuar shkaqet e këtyre rasteve