Gjatë ditës së sotme në rrethin e Gjirokastrës janë regjistruar disa vatra problematike zjarri ndërsa është dashur ndërhyrja e zjarrfikësve për shuarjen e tyre. Zjarri i parë është regjistruar rreth orës 11.30. në vendin e quajtur ish-furra e gëlqeres.
Në periferi të fshatit Derviçan nga flakët është përfshirë një sipërfaqe e konsiderueshme me shkurre. Për shuarjen në kohë të këtij zjarri kanë ndërhyrë efektivat dhe mjetet zjarrfikëse të bashkive Dropull dhe Gjirokastër. Falë punës së tyre është evituar rreziku i kësaj vatre zjarri për banorët e Dropullit.
Zjarri i dytë u regjistrua në fushat e fshatit Lazarat, rreth orës 14.00, në vendin e quajtur, Siloni. Zjarri ka marrë përmasa të mëdha ndërsa është dashur ndërhyrja e dy grupeve operacionale të zjarrfikësve të bashkisë Gjirokastër për shuarjen e tij,
Shërbimi zjarrfikës në Gjirokastër apelon që në këto ditë të nxehta vere banorët të tregohen të kujdesshëm për evitimin e zjarreve.