Një pallat është përfshirë nga flakët pasditen e së martës në Tiranë. Burimet bëjnë të ditur se ngjarja ka ndodhur te Farmacia nr.10, përballë spitalit “Nënë Tereza” në kryeqytet, në kompleksin ‘Arlis’.
Zjarri ka marrë përmasa të mëdha, duke përfshirë thuajse të gjithë godinën, brenda së cilës ndodheshin njerëz. Në aksionin për shuarjen e flakëve kanë marrë pjesë 8 zjarrëfikëse, autoambulanca, 2 helikopterë Cougar dhe 50 persona, zjarrëfikës, ushtarë, forca të Policisë dhe RENEA-s. Ndërkohë që raportohet se në terren ka zbarkuar edhe ministri i Brendshëm, Besfort Lamallari, për të vëzhguar nga afër situatën.
Nga pamjet duket se në zonë është shkaktuar një kaos i vërtetë, me qytetarë që vrapojnë për t’u larguar sa më parë nga flakët. Burimet bëjnë me dije se 7 persona po trajtohen në QSUT për shkak të asfiksisë.
Zjarri ka ‘alarmuar’ Qendrën Spitalore Universitare ‘Nënë Tereza’ (QSUT). Burime për Report Tv bëjnë të ditur se repartet e Urgjencës dhe Djegies Plastike janë vënë në gatishmëri, për çdo situatë që mund të krijohet.
Kujtojmë se në shtator të vitit 2023, një pallat 10-katësh në Tiranë në zonën e ish-parkut të Autobusëve u përfshi nga flakë të mëdha, të cilat u izoluan pas rreth 3 orësh.