Sot u bë betimi përpara presidentit Ilir Meta të zëvendëskryeministrit dhe ministrave të rinj të kabinetit “Rama”. Gjatë kësaj ceremonie ndryshe nga herët e tjera, në Presidencë nuk u paraqit kryeministri Edi Rama, por ai u përfaqësua nga Sekretari i Përgjithshëm i Kryeministrisë, Engjell Agaçi.
Po ashtu ra në sy dhe mungesa e Kryetarit të Parlamentit, Gramoz Ruçi, i cili është përfaqësues në ketë ceremoni nga nënkryetarja e Kuvendit, Vasilika Hysi.
Ditët e fundit, kryeministri Rama dhe presidenti Meta janë përfshirë në një ‘betejë’ akuzash me njëri-tjetrin, ku nuk kanë munguar dhe fjalët e rënda si “pengmarrës’ apo ‘shantazhues’.
Vetë Rama nuk është dekretuar ende nga Meta, pasi ai është vetëpropozuar si ministri i ri Punëve të jashtme, deri në shprehjen e Gjykatës Kushtetuese për “ngërçin” e krijuar me kandidatin për ministër, Gent Cakaj.
Ndërkohë që pjesa tjetër e ministrave të rinj të votuar një ditë më parë janë shfaqur të qeshur në presidencë, disa momente para se të vënë dorën mbi Kushtetutë. Në sy ra shtrëngimi i veçantë i duarve mes Ilir Metës dhe zv.kryeministrit, Erion Braçe.