Në Konferencën e Sigurisë në Mynih, zv/presidenti i Shteteve të Bashkuara, JD Vance, shprehu shqetësimin mbi gjendjen e lirisë së fjalës në Europë.
“Në Britaninë e Madhe dhe në të gjithë Evropën, liria e fjalës është në rënie. Nuk mund t’u imponosh njerëzve se çfarë të mendojnë, të ndiejnë apo të besojnë. Fatkeqësisht, kur shoh Evropën sot, nuk është gjithmonë e qartë çfarë ka ndodhur me disa prej fituesve të Luftës së Ftohtë”, deklaroi ai.
Vance gjithashtu nënvizoi se me kthimin e Donald Trump në pushtet, SHBA ka një qasje të re në politikën ndërkombëtare. “Me Donald Trump ka një sheriff të ri në Uashington”, u shpreh ai.
Duke folur për marrëdhëniet transatlantike, Vance theksoi se sfida kryesore për Evropën nuk është kërcënimi nga Rusia apo Kina, por një rrezik i brendshëm: largimi i Bashkimit Evropian nga vlerat e përbashkëta me Shtetet e Bashkuara.
Sa i përket luftës në Ukrainë, ai deklaroi se SHBA shpreson për një “marrëveshje të arsyeshme” midis Ukrainës dhe Rusisë, duke sugjeruar një qasje më pragmatike në diplomaci.