Zyrat e aplikimit për karta identeti do të jenë të hapura dhe këtë të shtunë në të gjitha qytetet kryesore të vendit. Ministria e Brendshme njofton se për shkak të fluksit të lartë të apliimeve për Tiranën dhe disa qytete kryesore të vendit zyrat do të jenë hapur dhe më 26 janar.
“Drejtoria e Përgjithshme e Gjendjes Civile, për shkak të fluksit të lartë të aplikimeve për karta ID dhe për tu ardhur në ndihmë qytetarëve, ka urdhëruar hapjen e gjithë zyrave të aplikimit për Tiranën dhe disa prej qyteteve kryesore të vendit, gjatë ditës së shtunë, datë 26 janar. Në kuadër të masave që janë marrë për përballimin e fluksit të qytetarëve, ditën e shtunë, përveç të gjitha zyrave të njësive administrative të Tiranës, do të jenë funksionale zyrat e aplikimit në qytetet: Berat, Durrës, Elbasan, Fier, Lushnje, Korçë, Shkodër dhe Vlorë”, thotë Ministria e Brendshme.
Ajo u bën apel qytetarëve të verifikojnë afatet e vlefshmërisë së kartës ID, në mënyrë që të aplikojnë më herët pa krijuar flukse dhe radhë pritjeje.