Pas 2 sezoneve shumë pozitive me Almerian në La Liga 2, Ivan Balliu mbrojtësi i cili numëron edhe 2 paraqitje me kombëtaren shqiptare ka bërë hapin e madh duke u transferuar në Primera Division. 29-vjeçari i cili aktivizohet si mbrojtës i djathtë është zyrtarizuar si afrimi më i ri i Rayo Vallecanos klub i sapo-ngjitur në elitën e futbollit spanjoll.
Balliu ka firmosur për 2 vite me skuadrën madrilene dhe do të jetë një vlerë e shtuar për Rayon në sezonin e ri që do të nisi më 13 gusht. Balliu është transferuar me parametër zero te Rayo Vallecano pasi prishin me konsensus kontratën me Almerian.
Mbrojtësi shqiptar i cili në karrierën e tij ka spikatur edhe me fanellën e Metz në Francë, në dy sezonet e fundit me Almerian ka qenë një titullar i padiskutueshëm duke u aktivizuar në total në 66 ndeshje në të cilat ka realizuar dhe 1 gol. Nëse edhe te Rayo Vallecano vazhdon të ruajë ritmet e Almerias Balliu edhe në La Liga do ta ketë të sigurt vendin në formacionin titullar. Me kombëtaren shqiptare Ivan Balliu është aktivizuar në sfidën ndaj Spanjës të cilën kuqezinjtë e humbën 3-0 për eliminatoret e Botërorit Rusi 2018 dhe në duelin ndaj Turqisë i humbur me shifrat 0-2 në Loro Boriçi sfida e parë kualifikuese për Euro 2020, periudhë në të cilën kombëtarja shqiptare drejtohej nga Christian Panucci.