Kristjan Asllani ka nisur zyrtarisht një aventurë të re në karrierë. Mesfushori i Kombëtares shqiptare është prezantuar nga Al Jazira, duke u bërë lojtari më i ri i klubit nga Emiratet e Bashkuara Arabe.
Klubi nga Abu Dhabi zyrtarizoi transferimin përmes rrjeteve sociale, duke i uruar mirëseardhjen mesfushorit shqiptar me mesazhin: “Numri ynë 23”.
“Al Jazira ka nënshkruar me mesfushorin e Kombëtares shqiptare Kristjan Asllani në formë huazimi nga Interi”, njoftoi klubi.
Transferimi vjen pas disa ditësh negociatash mes Al Jaziras dhe Interit. Fillimisht, më 25 gusht, u raportua se palët kishin arritur një marrëveshje verbale për huazimin e Asllanit.
Sipas raportimeve të Fabrizio Romanos, marrëveshja parashikon një pagesë prej 2 milionë eurosh për huazimin, ndërsa klubi nga Emiratet ka edhe një opsion blerjeje prej 6.5 milionë eurosh, i cili mund të shndërrohet në detyrim në varësi të kushteve të përcaktuara në kontratë.
Raportimet e mediave italiane një ditë më vonë flisnin për një strukturë të ngjashme të operacionit, por me shifra të ndryshme, ndërsa palët vijonin finalizimin e detajeve të kontratës.
Tashmë gjithçka është zyrtare dhe Asllani do të mbajë fanellën me numrin 23 te Al Jazira.
23-vjeçari largohet nga Interi pas një periudhe ku nuk arriti të siguronte një rol të rëndësishëm në formacionin zikaltër. Në Emirate, mesfushori i Kombëtares shqiptare synon të gjejë më shumë hapësira, minuta loje dhe të marrë një rol protagonist në skuadrën e re.