Që prej 1991, fjongoja rozë është simbolika e kancerit të gjirit, rozë si ngjyra simbol e gjininë që prek më shumë. Por burrat nuk janë imunë prej këtij lloj kanceri. As ata shqiptarë.
Manjola Luzi, Shefe e Klinikës së Onkologjisë Durrës thotë se ka hasur 3-4 pacientë meshkuj të prekur nga kanceri i gjirit.
Fakti që vetëm 1% e të prekurve me kancer gjiri janë meshkuj, e bën njohurinë mbi për të pothuajse inekzistente. Por si shfaqet kanceri i gjirit tek meshkujt? A ndryshon ai nga i femrave?
“Në rastin se ka një formacion ose sheh një gjëndër, ose një ndryshim në gjirin e tij ky duhet të kontrollohet”, thotë mjekja Mati.
“Ndryshime të lëkurës, tërheqje të saj, dëmtime të saj, skuqje të lëkurës, nëse ka sekrecione me ngjyrë të kuqe nga gjiri, hemorragjike, patjetër edhe kjo është një shkak”, shpjegon mjekja Manjola Luzi.
1 në 8 gra është e rrezikuar të preket nga kanceri i gjirit të paktën një herë në jetën e saj. Tek meshkujt raporti është 1 në 833. Kryesisht janë burra mbi 50 vjeç ata zhvillojnë këtë lloj kanceri, raporton Euronews.
Nëse nëna ka vuajtur nga kanceri i gjirit, mundësinë për ta trashëguar e kanë si djali dhe vajza. Po ashtu, personat që vuajnë nga sëmundje që çrregullojnë balancat midis hormoneve femërore dhe mashkullore, janë të rrezikuar.