Deputeti socialist Fatmir Xhindi u vra 10 vite më parë në derën e shtëpisë, ndërsa sot për herë të parë djali i tij Anduel Xhindi, i cili është tashmë deputet, ka treguar si e mori lajmin.
Deputeti zbuloi se lajmin e mori nga mamaja, pasi nuk ishte në shtëpi, ndërkohë që tregoi se nëna e tij ka qenë në shtëpi në momentin kur i ekzekutuan bashkëshortin.
“Në orën 20:45 morëm lajmin për vrasjen. Nuk ka pasur asnjë lloj shqetësimi, jo vetëm atë ditë por edhe ditët e mëparshme. Nuk ndjente asnjë frikë, nuk ka marrë asnjë telefonatë, nuk ka pasur asnjë lloj shqetësimi përveç të zgjedhjeve se po merrej me fushatën.
Ne kemi qenë më shumë shokë sesa kemi pasur marrëdhënien prindër-fëmijë. Atë ditë unë isha me tim atë deri në drekë. Në darkë isha me kushërinjtë, ne kishim dalë në Roskovec po pinim kafe dhe na mori mamaja në telefon dhe na tha që kanë vrarë Fatmirin. Mamaja ndodhej në shtëpi. Ajo kishte menduar se mos ishin fishekzjarre, kishte dëgjuar gjithçka, por nuk ja merrte mendja. Personi i parë që e pa ishte xhaxhai se jemi familje shumë e lidhur dhe çdo darkë mbidheshim te gjyshja. Nuk na shkonte mendja në botë, kur shkuam pamë tim atë e besuam atë që kishte ndodhur. Im atë asnjëherë nuk ka qenë gjaknxehtë, as me ne asnjëherë nuk bërtiste, jo se jam unë djali i tij por i gjithë Roskoveci e thotë këtë.
Për herë të fundit që folëm më tha për të shkuar lart për të punuar me të bashkë tokën, por nuk pranova”, tha deputeti në emisionin “Kjo javë”, ndërkohë që deklaroi se i ndjeri Fatmir Xhindi është munduar t’i mbajë larg politikës atë dhe dy vëllezërit e tjerë.
“Neve na ka mbajtur pak larg politikës, faktikisht ka punuar shumë me ne si djem. Unë kam ardhur pak kohë këtu në Tiranë se kam vazhduar gjimnazin këtu dhe pavarësisht angazhimeve politike e gjente pak kohë mbasdite dhe vinte më kontrollonte detyrat.
Faktikisht mundohej të mos na fuste rrugës së politikës dhe nëpër fushata shumë rrallë mund të shkonim”, deklaroi Xhindi.