Europa është në luftë me përmbytjet. Pas zjarreve, Greqia vijon që të përballet me përmbytjet që prej fillimit të kësaj jave. Për të tretën ditë me radhë, reshjet kanë përmbytur shtëpi, biznese e makina. Sipas mediave vendase, në Greqi, Turqi dhe Bullgari, numri i viktimave ka shkuar në 14, me ekipet e shpëtimit që kanë gjetur vetëm 7 trupa.
Veriperëndimi i Turqisë deri në kufi me Bullgarinë pothuajse janë përmbytur. Stambolli po vuan jo vetëm nga shirat, por edhe bllokimi i një pjese të qytetit, ku lëvizja e qarkullimi automjeteve është thuajse i pamundur. Në Stamboll, sipas kryebashkiakut, 1750 shtëpi e biznese janë përmbytur. Në Greqi, situata mbetet shqetësuese në Volos dhe Karditsa, kryesisht në perëndim, por dhe Athina u mbulua nga uji furishëm, duke e bërë të vështirë lëvizjen.
Në Bullgari, stuhitë vijojnë në qytetet jugore të Detit të Zi. Numri i viktimave zyrtare është katër, por mund të jetë edhe më i lartë. Ministri i turizmit, Dinkova tha se gati 4 mijë turistë të huaj kanë mbetur të bllokuar në restortet në bregun e Detit të Zi dhe problem mbetet transporti i tyre.