Më 1 maj të vitit 2004 do të shënohej edhe zgjerimi më i madh i Bashkimit Evropian me dhjetë vende të reja, Polonia, Hungaria, Republika Çeke, Sllovakia, Sllovenia, Lituania, Letonia, Estonia, Malta dhe Qipro, iu bashkuan BE-së.
Ky u quajt momenti më i guximshëm në historinë europiane pas Luftës së Dytë Botërore, dhe që u quajt “Big Bang”. Duke sjellë në vëmendje këtë moment, ish-ministri i Jashtëm Ditmir Bushati me një postim në Twitter, e quan një arritje historike pas Luftës së Ftohtë dhe sjell në vëmendje situatën aktuale përsa i përket procesit të zgjerimit.
“15 vite më vonë pranimi në BE i Ballkanit Perëndimor duket mjaft i largët, duke mos tejkaluar ende boshllëqet ekonomike dhe sociale”, thotë ish-ministri, duke e quajtur një punë të papërfunduar.
Pak ditë më parë dhe Presidenti i Komisionit Europian, Jean Claude Juncker, duke folur për “Big Bang” të 15 viteve më parë tha se nuk është zhgënjyer nga zgjerimi dhe se është mësuar shumë nga çdo shtet i ri anëtar që është bërë pjesë e BE-së.
Pas “Big Bang”-ut të 2004, Bashkimi Europian tkurri procesin e tij të zgjerimit, duke pranuar në 2007 Bullgarinë dhe Rumaninë dhe në 2013, Kroacinë.