Një tragjedi e rëndë ka ndodhur ditën e djeshme në Greqi, ku një shëtitje rutinë me makinë e katër djemve që sapo kishin mbaruar mësimin në gjimnaz rezultoi fatale për familjen e një 17-vjeçari shqiptar.
17-vjeçari i quajtur Fabio, për fat të keq u dogj i gjithi brenda makinës së drejtuar nga shoku i tij grek me të cilin ishte në të njëjtën klasë. Gjatë kohës që ata po udhëtonin, automjeti i tyre u përmbys anë rrugës duke marrë flakë tërësisht.
Djemtë e tjerë mundën të dilnin nga makina, por jo Fabio, i cili u bë shkrumb e hi brenda në makinën e përfshirë totalisht nga flakët. As ardhja e zjarrfikësve nuk e shpëtoi shqiptarin, i cili ndërroi jetë mes flakëve në Kefalonia të Greqisë.
Nga sa bëjnë me dije mediat greke, drejtuesi i makinës ishte një 18-vjeçar grek, i cili sapo e kishtë marrë patentën. Ai do të dalë sot para gjykatës për të marrë masën e sigurisë.
Grupi i të rinjve, i përbërë nga grekë dhe shqiptarë dolën për të bërë një xhiro me makinë fill pas mbarimit të mësimit në gjimnaz, por diçka shkoi keq dhe shoferi i ri humbi kontrollin e mjetit duke shkaktuar aksident.