Inspektorati Shtetëror i Mbikëqyrjes së Tregut (ISHMT) ka intensifikuar masat për zbatimin e të drejtave të pronësisë intelektuale, duke e konsideruar këtë proces jo vetëm një detyrim ligjor, por edhe një element thelbësor për garantimin e konkurrencës së ndershme në treg.
Sipas të dhënave zyrtare për periudhën janar- 17 prill 2026, ISHMT ka realizuar 191 inspektime në terren, të fokusuara në respektimin e pronësisë industriale dhe të drejtave të autorit.
Si rezultat i këtyre kontrolleve, janë vendosur 17 masa administrative dhe janë ndërmarrë 23 masa për ndalimin e tregtimit të mallrave të falsifikuara.
Gjatë monitorimeve, inspektorët kanë bllokuar dhe sekuestruar një sërë produktesh që cenojnë ose dyshohen se cenojnë markat tregtare të njohura.
Mes tyre përfshihen veshje dhe aksesorë, produkte detergjente, si dhe artikuj të ndryshëm të dyshuar për shkelje të të drejtave të markave.
ISHMT thekson se roli i tij mbetet kyç në mbrojtjen e të drejtave të pronësisë intelektuale, përmes inspektimeve të vazhdueshme, trajtimit të ankesave dhe monitorimit sistematik të tregut.
Sipas ISHMT-së, lufta kundër falsifikimit do të vijojë me intensitet, me synim garantimin e një tregu më të sigurt, më të drejtë dhe më konkurrues, si dhe mbrojtjen e konsumatorëve dhe operatorëve që respektojnë ligjin.