Babai i Martin Çeços, 26-vjeçarit që u gjet i mbytur më 18 qershor në rezervuarin e Maliqit, ka dhënë dëshminë e tij sot, një ditë pas arrestimit të Martina Pajollarit si e përfshirë në vrasjen e të riut.
I moshuari ka nxjerrë dhe një emër tjetër, si të përfshirë në vrasjen e djalit të tij. Bëhet fjalë për ish-burrin e motrës së Tinës, Xhoni Potka, me të cilin janë takuar në byrektore bashkë me Martinin. Ai i kishte premtuar se do t’i bënte Tinën për nuse, mblesë kjo që i kishte kushtuar 250.000 lekë të rinj, tregon Nevzat Çeço për “News24”.
Sipas tij, kjo mund jetë pikënisja e gjithçkaje kur një tentativë për fejesë nëpërmjet mblesëtarëve të lartpërmendur, lidhi dhe komunikimin ndërmjet të rinjve në telefon, veprim që bëri xheloz Valter Mollajn, autorin e vrasjes së 26-vjeçarit.
Me lot në sy, Nevzati thotë se Martinit i erdhi një telefonatë nga dikush i panjohur, por që nuk kishte dijeni kush fshihej pas asaj telefonate misterioze. E vetmja gjë që dinte ishte se telefonata kishte zë gruaje.
Ai pohoi më tej se Tina Pajollari i dërgonte Martinit foto të një varri me lule, por ai nuk e kuptoi mesazhin e fotografive që ajo i dërgonte të birit.
“Tina Pajollari i dërgonte Martinit foto të një varri me lule por nuk e kuptova mesazhin e fotografive që i dërgonte Tina. Natën kur ndodhi ngjarja, Tina Pajollari e ka marrë Martinin në telefon duke i kërkuar që të mos e shqetësonte me justifikimin se nuk ishin në dijeni prindërit të lidhjes së tyre. Tina Pajollari më pas i tha Martinit që do e telefononte të nesërmen në orën 10 në mëngjes. Pas përfundimit të bisedës me Tina Pajollarin, Martinin e ka telefonuar një person që s’e njihnim. Telefonuesi e ka kërcënuar Martinin duke i thënë që do t’i këpus buzët. Në gjendje të rënduar psikologjike, Martini iku e më tha, jeta ime mbaron këtu. Pas kësaj Martini i shqetësuar ka dalë nga shtëpia me shapkat që gjeti tek shkallët e shtëpisë. E kërkova gjitha natën sipër shtëpisë duke pasur frikë se mos Martini kishte varur vetën më pas kërkova edhe tek rezervuari i fshatit, por nuk ka parë asgjë të dyshimtë,”- thotë ai.