Në 29 vite tranzicion Shqipëria ka kaluar mjaft trazira, ku më e rënda, ajo që ktheu vite pas zhvillimin e vendit ishin trazirat e ’97, që erdhën si pasojë e skemave piramidale. Në atë kohë president i vendit ishte Sali Berisha.
Edhe sot situata politike në vend nuk është e qetë, teksa prej 40 ditësh opozita proteston. 22 vite më parë, për t’iu larguar situatës tragjike në vend 81 persona nga 140 që ndodheshin në bordin e Katerit të Radës humbën jetën në kanalin e Otrantos.
Ende sot familjarët e viktimave shkojnë në Vlorë ku në brigjet e detit hedhin lule në kujtim të të afërmve të tyre që i “piu” deti në kërkim të një jete më të mirë. Edhe sot ata mendojnë se drejtësia nuk është vënë në vend.
TRAGJEDIA E OTRANTOS
Ishte data 28 Mars e vitit të mbrapshtë 1997 kur në kanalin e Otrantos, marina italiane Sibilia u përplas me anijen shqiptare Kateri i Radës e cila ishte nisur nga qyteti i Vlorës me 140 persona në bord. Anija italiane Sibilla kërkoi të ndalonte dhe të inspektonte anijen nëse kishte emigrantë të jashtë-ligjshëm por që përfundoi duke e përmbytur atë.
Familjarët për vite më radhë zhvilluan një betejë të ashpër e këmbëngulëse me drejtësinë italiane, për të zbuluar motivin e sulmit të anijes italiane, urdhëruesit dhe autorët dhe për t’i ndëshkuar ata për këtë tragjedi të rëndë. Gjyqet u zvarritën ndërsa ende sot familjarët kërkojnë drejtësi.
Ajo që ka mbetur nga tragjedia, është anija shqiptare “Kater i Radës’ i kthyer si relike në bregun e Vlorës, pllaka përkujtimore me emrat e atyre që humbën jetën, kujtesa dhe lotët e familjarëve, që bëjnë homazhe çdo 28 mars, duke hedhur lule në det, në kujtim të tyre!
U deshën 6 muaj pas ngjarjes, që anija “Kater i Radës” të nxirrej nga fundi i detit bashkë me një pjesë të trupave të viktimave. Në lidhje me tragjedinë e Otrantos, drejtësia bëri objekt të gjykimit si fajtorë, kapitenin e anijes italiane “Sibilla”, Fabrizio Laudadio dhe kapitenin e anijes shqiptare “Kateri i Radës”, Namik Xhaferri.
