Ra aksidentalisht apo e hodhën? Është kjo pyetja që mban të veshur me mister ngjarjen e rëndë, që ndodhi më 13 gusht të këtij viti dhe që u mbajt e fshehur për tri muaj me radhë. Polica e Shtetit, thonë se ishte shoqja e saj që bëri denoncimin më 14 gusht se kishte humbur kontaktet dhe nisën menjëherë hetimet.
22-vjeçarja me origjinë nga Kenia J.A po lufton për jetën në një spital të Tiranës, pasi u gjet pa ndjenja poshtë pallatit ku banonte në një apartament në katin e dytë. E reja ishte e punësuar në një Kazino në qendër në Tiranës, kur më 13 gusht të këtij viti ajo u zhduk papritur rreth orës 03:25 deri në orën 07:00 të mëngjesit.
Pasi u dërgua në spital, mjekët thanë se kishte tre brinjë e kocka të thyera, lëndime në dorë e stomak dhe dëmtime në tru. Nëna e saj R.A, një muaj pas ngjarjes u njoftua nga kompania ku ishte e punësuar e bija dhe që nga momenti që mbërriti nga Kenia, spitali është kthyer në shtëpinë e saj.
E bija ndodhet ende në gjendje të rëndë, ndërsa mbahet në jetë përmes aparaturave. Ende e shokuar, ajo shprehej e bindur se dikush tjetër fshihet pas kësaj ngjarje.