24 vite lot e dhimbje për vrasjen e djalit nga Forcat Speciale

Razie Muharremi, nëna e të ndjerit Albert Muharremi, i vrarë nga Forcat Speciale në qendër të qytetit Burrelit, në qershor të vitit 1997 ka dhimbje dhe lot.
“Prej vitit 1997 kam kërkuar zbardhjen e të vërtetës, pasi një qytet i tërë i ka parë Forcat Speciale kur qëlluan mbi djalin tim të pafajshëm. Kam shkruar dhjetra letra për presidentët, kryeministrat, ministrat e drejtësisë dhe nuk kam marrë një përgjigje të saktë”, shprehet Razie Muharremi.
Ka bërë kërkesë padi para Gjykatës së Matit dhe ka kërkuar detyrimin e palës së paditur, Forcave të Ndërhyrjes së Shpejtë Tiranë, ish Reparti i Ndërhyrjes së Shpejtë 711, në vartësi të Ministrisë së Brendëshme të paguajë dëmin e ardhur nga vrasja e djalit. Nëna e Albert Muharremit thotë se dëmshpërblimin nuk e kërkon për të përfituar para për vete, por për të çuar deri në fund të vërtetën dhe për t’i përdorur ato para për bamirësi.
Mësohet se banorë të qytetit Burrelit, dëshmitarë okularë në momentin kur efektivët kanë qëlluar me breshëri në sheshin “Demokracia”, kanë dëshmuar në prokurori rreth ngjarjes.
“Të shtënat vinin nga pozicioni ku qëndronin forcat speciale të policisë që kishin ardhur nga Tirana”, “Albert Muharremi është plagosur nga i njëjti punonjës Policie që ishte pozicionuar pranë Kryqëzimit të Spitalit.” “Viktima Albert Muharremi është vrarë gjatë gjuajtjes me armë zjarri të punonjësit të Policisë së Repartit 711”, janë disa nga deklarimet e dëshmitarëve në organet e drejtësisë.
Albert Muharremi është shpallur “Qytetar Nderi” i Burrelit nga Këshilli Bashkiak./ Tirananews