Policia e Kapshticës ka vënë në pranga dy persona pasi kanë tentuar të kalojnë pa deklaruar një shumë prej rreth 25 mijë eurosh.
Sipas policisë ata kishin fshehur në trup sasitë e lekëve, e bëhet fjalë për një 46-vjeçar nga Memaliaj rezident në Greqi dhe një shtetase bullgare që udhëtonte me të.
NJOFTIMI I PLOTE
Vijon kontrolli i imtësishëm i mjeteve dhe qytetarëve, me qëllim parandalimin dhe goditjen e paligjshmërisë. Sekuestrohen nga Policia Kufitare 25000 euro. Procedohen penalisht 2 poseduesit, të cilët nuk i deklaruan në kufi. Në vijim të kontrolleve të imtësishme, me qëllim parandalimin e krimeve ndërkufitare, shërbimet e Policisë Kufitare në P.K.K Kapshticë, në dalje të Republikës së Shqipërisë, përzgjodhën për kontroll në vijën e dytë shtetasin J. R., 46 vjeç, nga Memaliaj, rezident në Greqi dhe shtetasen bullgare D. D., 31 vjeçe, të cilët udhëtonin me mjetin e tyre.
Gjatë kontrollit të ushtruar nga shërbimet e Policisë Kufitare, në bashkëpunim me shërbimet doganore, këtyre shtetasve iu gjet një sasi prej 25000 eurosh, të fshehura në trup, të cilat nuk i kishin deklaruar para autoriteteve. Veprimet në lidhje më këtë rast janë kryer nga specialistët e Seksionit të Krimit Ekonomik në DVP Korçë, të cilët kanë filluar procedimin penal ndaj këtyre shtetasve.