Putin rikthen në qendër të vëmendjes kërcënimin bërthamor, në një moment kur lufta në Ukrainë vazhdon të ushtrojë presion mbi Moskën.
Siç ka ndodhur edhe më parë gjatë përshkallëzimeve të konfliktit, Vladimir Putin ka përdorur retorikën e arsenalit bërthamor për të forcuar qëndrimin e brendshëm dhe për të dërguar sinjal frikësimi ndaj Perëndimit dhe mbështetësve të Kievit.
Presidenti rus deklaroi se Rusia do të vendosë në shërbim deri në fund të vitit raketën e re strategjike bërthamore “Sarmat”, të cilën e përshkroi si “më e fuqishmja në botë”. Ai tha se kjo raketë është e aftë të godasë objektiva në distanca mijëra milje larg, përfshirë SHBA-të dhe Europën, dhe se ka një kapacitet shkatërrues disa herë më të madh se çdo ekuivalent perëndimor, me rreze veprimi që tejkalon 35 mijë kilometra.
Megjithatë, sipas analistëve perëndimorë të sigurisë, disa nga pretendimet e Moskës për aftësitë e gjeneratës së re të armëve bërthamore mund të jenë të ekzagjeruara, në kuadër të programit të modernizimit ushtarak të shpallur që në vitin 2018.
Ata kujtojnë gjithashtu se raketa “Sarmat” ka pasur probleme në testimet e mëparshme, përfshirë edhe një dështim të raportuar në vitin 2024. Nga ana tjetër, televizioni shtetëror rus publikoi deklarata të komandantit të forcave strategjike raketore, i cili raportoi një test të suksesshëm të sistemit “Sarmat” dhe tha se vendosja e tij do të rrisë ndjeshëm aftësinë e Rusisë për të garantuar goditje strategjike dhe parandalim ushtarak.
Që nga fillimi i luftës në Ukrainë në vitin 2022, Putin ka kujtuar vazhdimisht fuqinë e arsenalit bërthamor rus në deklarata që Perëndimi i ka interpretuar si përpjekje për të frenuar ndërhyrjen e mëtejshme në mbështetje të Ukrainës.
Ndërkohë, presidenti ukrainas Volodymyr Zelensky deklaroi se Ukraina ndodhet në një nga pozicionet e saj më të forta të viteve të fundit dhe njoftoi krijimin e një koalicioni ndërkombëtar për mbrojtje kundër raketave balistike, pas një takimi me këshilltarë të sigurisë nga 13 vende evropiane.
“Duhet të arrijmë qëllimin kryesor, i cili është edhe qëllimi ynë i përbashkët dhe nga i cili nuk do të tërhiqemi: nuk do të dorëzojmë as tokën tonë dhe as sovranitetin tonë”, tha Zelensky.