Fermerët në vendin tonë po vijojnë të përdorin skemën e kompensimit përmes autofaturës pasi mbi 4 mijë aplikime janë kryer online gjatë dy muajve të fundit.
Sipas të dhënave të Drejtorisë së Përgjithshme të Tatimeve, nga 1 korriku deri më 31 gusht prej totalit të mësipërm të aplikimeve, 2 mijë e 906 të tilla janë miratuar, ndërsa 1 mijë e 16 janë ende në proces shqyrtimi.
Në total vlera e kompensimit, në masën prej 10% arrin në rreth 10 milionë euro duke përfaqësuar shumën totale të përfitimeve të parashikuara nga aplikimet.
Ashtu sikurse është bërë e ditur prej muajsh nga qeveria, skema e autofaturës synon të thjeshtojë procedurat për fermerët dhe ka për qëllim të rimbursojë TVSH-në 10% që fermeri ka paguar për inputet bujqësore, si plehrat kimike, farat dhe fidanët, duke ulur kostot e prodhimit dhe duke nxitur formalizimin e transaksioneve në këtë sektor të rëndësishëm për vendin.
Drejtoria e Përgjithshme e Tatimeve u rikujton fermerëve se procedura e aplikimit për autofaturën kryhet online përmes “E-Filing”, duke mundësuar aksesimin e kompensimit nëpërmjet një procedure të digjitalizuar.