Kompania celulare ONE Albania vazhdon të lërë qytetarët pa shërbim, edhe përse kanë kaluar ditë qëkur njoftoi përfundimin “me sukses” të procesit të unifikimit me Albtelekom. Pavarësisht reklamave për shërbim cilësor, duket se abonentët e ONE Albania nuk po gjejnë rehat.
Në kushtet kur numri i shërbimit “123” nuk funksionon dhe në dyqanet fizike nuk gjejnë zgjidhje, pasi mungesa e shërbimit buron diku tjetër, qytetarët kanë zgjedhur të demaskojnë faqen zyrtare në internet të ONE Albania.
Nga një vëzhgim i thjeshtë në rrjetin social Facebook, por jo vetëm, bie në sy se 99% e komenteve janë negative dhe akuzojnë kompaninë celulare për mungesë shërbimi, çmime të rritura të paketave dhe reduktim të sasisë së internetit në ofertat mujore.
E gjithë kjo situatë kaotike ka ndodhur për shkak të dështimit të procesit të bashkimit të Albtelekom dhe ONE nën logon ONE Albania. Dy kompanitë kaluan në pronësi të 4iG International dhe unifikimi u tentua fillimisht në 1 Prill, por dështoi, ndërsa më 8 Prill u vendos të bëhej manualisht.
