Hismet Smakaj është bërë hero në Angli, pasi u hodh në një pjesë të rrezikshme të lumit Thames për të shpëtuar një vajzë të re që po mbytej. Sipas mediave, 65-vjeçari nga Shkodra është lavdëruar për trimërinë e tij, pasi hyri në një lum në Londrën Lindore për të nxjerrë 7-vjeçaren duke e shpëtuar nga mbytja. 65-vjeçari dhe gruaja e tij po ecnin në Parkun Thames Barrier pranë shtëpisë së tyre në Newham kur ai vuri re vajzën pranë lumit, e cila më pas u hodh në ujë.
Djali i Hismetit, Euklid Smakaj, tregoi se si babai i tij e shpëtoi vajzën e vogël. ”Ndërsa po ecnin nëpër park, babai im pa këtë vajzën e vogël që po shikonte lumin dhe më pas u hodh brenda. Ajo po mbytej. Babai im as nuk mendoi dy herë dhe u fut brenda ta shpëtoi”. Ai notoi rreth pesë metra, mezi i shihte flokët vajzës sepse po fundosej, uji ishte shumë i lartë dhe ai e kapi atë që ta nxjerr nga aty.
I kontaktuar nga Top Channel, Smakaj thotë se “nëse nuk do ta shpëtoja vajzën do më mbetej peng tërë jetën”. Në rrëfimin e tij, Smakaj u shpreh se ”u ndje i kënaqur kur mundi ta kapë vajzë, teksa ishte mbi ujë e nuk shkoi poshtë e të humbte në baltën e lumit. Pa asnjë hezitim do ta bëja përsëri atë që bëra”, thotë shkodrani hero Hismet Smakaj. I pyetur nëse është kontaktuar prej prindërve të fëmijës që shpëtoi, Hismeti tregon se kjo nuk ka ndodhur ende. ”Nuk e di nëse vajza vijon të jetë në spital apo ka shkuar në shtëpi. Kam shumë dëshirë të mësoj si është ajo”, deklaron Smakaj.
