Vetëm pesë ditë nga nisja e sezonit të provimeve për mësuesit që duan të sigurojnë një vend pune, publikohen datat për çdo profil.
Të parët që do të testohen janë mësuesit e Gjuhës Shqipe e Letërsisë, më të shumtët në numër, të cilëve iu janë lënë pesë ditë kohë, të ndjekur më pas nga mësuesit e arsimit fillor, atij parashkollor dhe të gjuhëve të huaja.
Në tabelën përbri shkrimit pasqyrohen datat vetëm për nëntë profile, nga 17 të tilla që pritet të publikohen ditët në vijim. Pas datave, QSHA po punon për listën e mësuesve, e cila pritet të jetë e disponueshme shumë shpejt në faqen zyrtare.
Në bazë të saj, kandidatët për punë do të paraqiten gjysmë ore përpara orarit të përcaktuar, të pajisur me dokumentacionin e duhur: kartë ID, një kopje të saj si dhe formularin e pjesëmarrjes në testim.
Njëjtë si provimi, edhe rregullat janë të ngjashme. Përveç komunikimit, nuk lejohet asnjë lloj ushqimi e madje, as marrja me vete dhe përdorimi i celularëve. Shkelja, qoftë e vetëm një prej rregullave të mësipërme apo mungesa në dokumentacion penalizon kandidatin. Nga 5953 mësues që kandidojnë për të zënë një vend pune, vetëm 4300 do të jenë pjesë e testimit, pikët e të cilit janë thuajse vendimtare për punësimin përgjatë këtij viti shkollor.
PYETJET NË PROVIM
Kandidatët për mësues futen në testimin e ngjashëm me atë të licencës, ku pyetjet zgjidhen automatikisht nga kompjuteri që disponon një fond me mijëra të tilla. Testi është i ndarë në dy pjesë: çështjet didaktike që kanë 43% të peshës totale, ndërsa përmbajtja shkencore e profilit të mësuesisë përbën 57%.
Nga provimi me 50 pyetje, ato janë planifikuar me nivele të ndryshme vështirësie, të cilat do të vlerësohen me pikë të ndryshme. Të gjitha do të jenë me alternativa, 30 prej të cilave të nivelit mesatar, 10 nga ato që konsiderohen të lehta dhe po aq pyetje që hartuesit i kanë futur në grupin e të vështirave.
Një pjesë e mirë e pyetjeve kanë të bëjnë me aspekte të pedagogjisë dhe metodologjisë dhe gati po aq nga programi lëndor. Nuk do të mungojnë edhe aspekte të drejtshkrimit të gjuhës shqipe, etikës dhe komunikimit si dhe çështje të dokumentacionit shkollor