Në Rrugën e Kombit, gjatë orëve të mbrëmjes ka nisur qarkullimi i automjeteve pas pezullimit të lëvizjes për orë të tëra. Probleme vijon të ketë në aksin Bajram Curri-Valbonë, ku gjatë së enjtes ranë orteqe në 2 vende, që si pasojë bllokuan qarkullimin.
I njëjti fenomen ka ndodhur edhe në Qafën e Malit-Fierzë në vendin e quajtur “Arste” dhe “Porav”. 60 centimetra ka arritur trashësia e dëborës në qytetin e Peshkopisë gjatë orëve të mbrëmjes, ndërsa në zonat e thella tashmë ka kaluar një metër, duke izoluar thuajse të gjithë fshatrat.
“Në rrugën nacionale Peshkopi-Tiranë është bërë i mundur kalimi me zinxhirë, por situata është ende problematike në Qafën e Ulzës dhe në Bulqizë”. Në këtë aks nuk kanë munguar as aksidentet. Në Shkodër, borëpastrueset po mbajnë hapur rrugët nacionale. Një borëpastruese po punon gjatë gjithë kohës në aksin Shkodër-Hani i Hotit, reshjet e dëborës janë intensive.
Edhe në Mirditë, trashësia e dëborës që arrin deri në 40 centimetra, ka sjellë bllokim të rrugëve dhe mungesë të energjisë elektrike. Pjesa më e madhe e fshatrave janë të bllokuara. Një grua nga Labinoti, Katund i Elbasanit, e lindi fëmijën e saj në kushte shtëpie.
Në jug situata më problematike paraqitet në qarkun e Gjirokastrës, pasi të gjitha fshatrat janë izoluar nga dëbora. Kalimi është i mundur vetëm në rrugët nacionale. Në juglindje, bora kalon gjysmë metër. Të gjitha zonat malore në Korçë janë të izoluara. Aksi Korçë-Qafë Thanë-Kapshticë është i kalueshëm normalisht, ndërsa në rrugët e tjera nacionale lëvizet vetëm me zinxhirë. Situata e motit ka krijuar vështirësi edhe në zhvillimin normal të procesit mësimor.