Debatet e herë pas hershme dhe xhelozia e tepruar ishin motivi i vrasjes së Hazbie Kukës nga bashkëshorti i saj pasditen e të premtes. E gjithë ngjarja ndodhi në sy të fëmijës së tyre 8-vjeçar, i cili më pas ka lajmëruar fqinjët për ngjarjen e rëndë.
Hazbia mbeti e plagosur rëndë dhe u dërgua menjëherë në spital nga dy vëllezërit dhe djali i saj, por fatkeqësisht nuk i mbijetoi dot plagëve të mara nga goditjet me thikë nga bashkëshorti i saj, Ardiani.
Ky i fundit u gjet i mbytur sot në bregdetin e Durrësit. Ngjarja ndodhi rreth orës 16.20 kur Ardiani sapo ishte kthyer nga puna ku punonte si shofer pranë OSHEE-së.
Debatet mes tyre kishin nisur kohët e fundit, teksa Hazbia kishte nisur të punonte si edukatore në një kopësht në Durrës. Ardiani bëhej shumë xhelo për të, pasi kishte nisur të vishej më mirë se zakonisht, pasi tashmë ishte në marrëdhënie pune. Por kjo e bënte Ardianin të dyshonte për ndonjë lidhje jashtëmartesore të saj.
Konfliktet kishin nisur të shtoheshin derisa pasditen e të premtes degjeneruan në përdorimin e thikës ku i pranishëm ishte dhe vogëlushi.
Ndërkohë, i mituri, që është edhe fëmija i vetëm i çiftit, lajmëroi menjëherë dajat, të cilët jetojnë pranë banesës së familjes Kuka. Dy vëllezërit e Hazbies mbërritën për pak minuta dhe e transportuan drejt spitalit, ku fatkeqësisht ndërroi jetë. Një prej goditjeve i kishte prekur zemrën, plagë që rezultoi fatale për 36-vjeçaren.
