Kryeministri Edi Rama ka publikuar sot qëndrimin e aktorit të njohur, Luftar Paja, i cili i është bashkuar zërave të artistëve që kërkojnë ndërtimin e një Teatri të Ri Kombëtar.
Sipas Ramës, Paja është një ndër protagonistët e skenës kombëtare shprehet pa asnjë ngurrim në krah të shumicës së komunitetit teatror.
“Luftar Paja është një tjetër protagonist i skenës sonë kombëtare, i cili shprehet pa asnjë ngurrim në krah të shumicës së komunitetit teatror që kërkon ndërtimin e Teatrit të Ri Kombëtar. Ai jep një mesazh kuptimplotë për të gjithë ata që sikur të merreshin me artin, aq sa merren me protesta për tullat e për llaçin (ajo godine në fakt s’ka as tulla, po tallash e qereste), do kishin lënë me siguri më shumë vepra se sa fjalime për qerestenë.
LUFTAR PAJA:
Jam për Teatër të ri Kombëtar, me të gjitha përmasat që i takon një teatri nacional shqiptar. Ne si artistë kemi harruar gjërat kryesore dhe merremi me llaçin dhe tullat. Duhet të shtojmë forcat për llaçin dhe betonin artistik. Teatri Kombëtar e ka emrin Teatri Kombëtar dhe aty nuk duhet të vijnë vetëm ata që banojnë në Tiranë, por ata që e meritojnë të vijnë në teatër. Teatri është i gjithë Shqipërisë. Qëllimi im kryesor është që të ketë një teatër siç i takon Shqipërisë”, shkruan kryeministri Rama.
Më herët edhe djali i Luftar Pajes, aktori i “Portokalli”, Gazmend Paja që është njëherësh dhe anëtar i Këshillit Bashkiak të PS-së është shprehur pro shembjes së Teatrit dhe ndërtimit të një godine të re.