Përfundon aventura e Partizanit në Evropë. Ekipi i kuq u eleminua sot nga Liga e Evropës, pas barazimit me rezultatin 1 me 1 kundër Sherifit. Dhe pse të besuarit e Lerdës zhvilluan një ndeshje të mirë, prap fati nuk ishte me ta.

Kjo ndeshje ishte ndryshe për Partizanin, pasi luajtën që në fillim në sulm duke gjetur golin shumë shpejt dhe për 45 minutat e para ishin të kualifikuar. Një gol që ngjalli dyshime i demoralizoi kampionët e Shqipërisë, që ndonëse tentuan me disa mënyra, nuk patën më saktësinë e duhur për të shënuar.

Nga ana tjetër duhet thënë se Sherifi nuk ishte një kundërshtar i pakalueshëm dhe nëse Partizani nuk do ta kishte mbivlerësuar aq shumë në ndeshjen e parë, ndoshta sot do të ishin të kuqtë ata që do të festonin kualifikimin.

Partizani në këtë ndeshje shkonte me probleme të brendshme, që ndikuan dhe në atmosferën e ndeshjes. Nga ana tjetër kampionët e Shqipërisë me këtë nivel loje që treguan sot do të jenë më të sigurt drejt mbrojtjes së titullit.