Në 106 vjetorin e Policisë së Shtetit në ambjentet e Drejtorisë Vendore të Policisë Dibër u zhvillua një ceremoni zyrtare. Fjalën përshëndetëse e mbajti drejtori Edmond Tarkaj, ndërkohë Sekretarja e Përgjithshme e Prefekturës Donika Hyseni, uroi të gjithë punonjësit e Policisë në këtë përvjetor, si dhe në emër të Prefektit shprehu vlerësimet maksimale për punën e tyre. Gjatë kësaj ceremonie drejtori Tarkaj në emër të drejtorit të Përgjithshëm të Policisë së Shtetit, dorëzoi dy çertifikata me motivin “Shërbime të dalluara në punë’, për Ilir Musta dhe Roland Margjokaj. Në fjalën e tij Edmond Tarkaj tha se: “Efektivët e palodhur të Policisë së Shtetit, çdo ditë janë gati të përmbushin misionin e tyre. Çdo ditë me mund dhe sakrificë garantojnë një mjedis të sigurtë për komunitetin, nëpërmjet policimit me standartet më të larta. Vit pas viti misioni sa vjen dhe forcohet dhe puna e cdo efektivi është edhe më produktive duke fituar besimin e shumë qytetarëve çdo ditë. Festa jonë nuk mund të konceptohet pa kujtuar kolegët tanë, ata të cilët mbrojtën jetën me jetë, që në këtë përvjetor na bëjnë të ndihemi krenar, ndaj kemi obligimin moral e shpirtëror të përulemi në shenjë të thellë nderimi e respekti para varreve të shenjta, lapidarëve apo memorialeve të punonjësve të Policisë të rënë në krye të detyrës në emër të sakrificës sublime në përmbushje të misionit ligjor për të garantuar rendin e qetësinë publike në vend. Mirënjohje e respekt për ta”.
Tarkaj vlerësoi të gjithë ata që kontribuan dhe sakrifikuan në përballje me elementët kriminal , larg familjeve dhe në kushte jo të volitshme pune e jetese, por me bindjen e brendshme dhe pasionin e lartë për t’i shërbyer me vigjilencë e rigorozitet ligjit, mbrojtjes së jetës së qytetarëve me jetën e tyre dhe garantimin e një të ardhmeje të qetë në vend.