Banorët e zonës e kanë denoncuar në polici gomistin se mbante armë në punishten e tij.
Ngjarja është regjistruar në Kamzë, ku në sajë të operacionit të koduar “Shinat” është vënë në pranga E.K., 31 vjeç.
Sapo ka marrë njoftimin, efektivët kanë shkuar në gomisterine të riut ku nga kontrolli gjetën një armë zjarri kallashnikov.
NJOFTIMI
Bashkëpunimi komunitet – polici vë në pranga një 31-vjeçar për armëmbajtje pa leje
Finalizohet operacioni policor i koduar “Shinat”.
Sekuestrohet në cilësinë e provës materiale një armë zjarri kallashnikov.
Shërbimet e policisë të komisariatit Nr. 5, në sajë të informacioneve të dhëna nga qytetarët, finalizuan operacionin policor të koduar “Shinat”, në kuadër të të cilit u bë arrestimi në flagrancë i shtetasit:
E. K., 31 vjeç, banues në Kamzë/Tiranë.
Shërbimet e policisë kanë marrë informacion nga qytetarët se ky shtetas në gomisterinë e tij mbante sende të kundërligjshme.
Menjëherë nga shërbimet e policisë të komisariatit Nr. 5 është organizuar operacioni policor i koduar “Shinat”, ku në zonën e Fushë-Mëzezit, gjatë kontrollit të gomisterisë së shtetasit E. K., shërbimet e policisë kanë gjetur një armë zjarri kallashnikov, e cila u sekuestrua në cilësinë e provës materiale.
Në përfundim të veprime të para hetimore u bë arrestimi në flagrancë i shtetasit E. K., për veprën penale “Mbajtja pa leje e armëve luftarake dhe e municionit” dhe materialet u referuan për veprime të mëtejshme pranë Prokurorisë së Rrethit Gjyqësor Tiranë
