Policia e Krujës ka arritur të zbardhë ngjarjen e një muaji më parë ku një sasi eksplozivi shpërthue në një parukeri në Nikël të Krujës. Një person është vënë në pranga ndërsa një tjetër është shpallur në kërkim.
Sipas policisë të arrestuarit B.SH., 24 vjeç dhe të shpallurit në kërkim E.SH., 28 vjeç nga Nikël iu gjetën në shtëpinë e tyre kapsolla detonatore dhe fitila zjarrpërcjellës.
Lexo edhe- Parukjeres i vendosin tritol në biznes
Ngjarja ka ndodhur më 16 gusht të këtij viti, rreth orës 01.00 të natës ku një sasi eksplozivi shpërtheu në parukerinë e R. Sh. Fatmirësisht nuk pati lëndime në njerëz por vetëm dëme materiale. Ndërkaq nuk dihet ende shkaku i ngjarjes, teksa në atë kohë u tha se nuk ishte hera e parë që vendosej eksploziv në këtë parukeri.
NJOFTIMI I SOTEM I POLICISE
KRUJË
Policia e Krujës zbardh dhe dokumenton një ngjarje të ndodhur rreth 1 muaj më parë ku një biznesi në Nikë,l iu vendos lëndë eksplozive.
- Sekuestrohen kapsolla detonatore dhe fitila zjarrëpërcjellës;
- Nga puna hetimore e kryer në bashkëpunim edhe me Prokurorinë e Rrethit është arrestuar 1 shtetas dhe shpallur në kërkim 1 tjetër.
Specialistët për Hetimin e Krimeve në Komisariatin e Policisë Krujë në bashkëpunim me Prokurorinë e Rrethit, pas një pune hetimore intensive kanë zbardhur ngjarjen e ndodhur në datë 16 gusht 2019, ku biznesit (parukieri) të shtetases R.Sh., iu vendos lëndë plasëse.
Policia arrestoi në flagrancë, si autor i dyshuar për ngjarjen e mësipërme shtetasin B.Sh., 24 vjeç, banues në Nikël, për veprat penale “Shkatërrim prone me eksploziv” dhe “Mbajtja pa leje dhe prodhimi i armëve shpërthyese dhe municioneve”, si dhe shpalli në kërkim dhe po punohet për kapjen e shtetasit E.Sh., 28 vjeç, banues në Nikël.
Gjatë kontrollit në banesën e tyre u gjetën dhe sekuestruan në cilësinë e provave materiale:
• 5 fitila zjarrëpërcjellës;
• 5 kapsolla detonatore.
