Federata Shqiptare e Futbollit ka kthyer vendimin që kishte marrë për të zhvilluar pasditen e të dielës ndeshjen derbi mes Tiranës dhe Partizanit, duke e kaluar atë në orarin e darkës.
FSHF vendosi disa javë më parë, që kur u ndërpre ndeshja mes Tiranës dhe Teutës në “Selman Stërmasi”, që të gjitha skuadrat duhet të kishin garanci të plotë që situata të tilla të mos përsëriteshin. Të gjitha ekipet që kërkonin të luhej me ndriçim artificial praktikisht duhej të bënin investime shtesë në stadiume për të bërë të mundur ndriçimin e plotë të impianteve me parametrat e kërkuara dhe të mos kishin probleme si ai në kryeqytet me luhatjen e tensionit.
Sot, FSHF ka lënë pas dore pjesën e parë të urdhëresës, meqë në “Selman Stërmasi” nuk është bërë ende përmirësimi i impiantit të ndriçimit ekzistuese. Ajo thjesht ka bërë të ditur se ndeshja e planifikuar të dielën në orën 16:00, do të spostohej në orën 19:00, pasi kishte garanci nga OSHEE për mbarëvajtjen e sfidës.
Një vendim disi i çuditshëm, duke llogaritur se Tirana kishte bërë kërkesë zyrtare pak ditë më parë për ndryshimin e orarit dhe ajo ishte refuzuar nga institucioni i futbollit.