Kandidati hungarez i nominuar nga Presidentja e KE, Von der Leyen si eurokomisioner për zgjerimin, Laszlo Trocsanyi nuk do të bëjë seancën dëgjimore në Parlamentin Europian.
Sipas EU Observer, komisioni për çështjet juridike të Parlamentit vendosi pas një votimi se nuk ka qartësi të mjaftueshme për konfliktet e tij të interesit dhe ka mospërputhje të deklaratës së pasurisë, duke e rrëzuar nominimin e tij.
Tashmë i takon Presidentes Ursula von der Leyen nëse dëshiron të propozojë një kandidat të ri. I njëjti vendim u mor dhe për kandidaturën rumune Rovana Plumb.
Lexo edhe- Një ballkanas kandidat për t’u zgjedhur Komisioner për Fqinjësinë dhe Zgjerimin Evropian në PE
Trocsanyi ka qenë ministër i Drejtësisë i Hungarisë në qeverinë e Viktor Orban që nga 2014 derisa u zgjodh në maj në Parlamentin Evropian.
Ai kishte rol në miratimin e ligjeve që nga Brukseli u panë si minim i sundimit të ligjit në Hungari duke shkaktuar konflikte mes Brukselit dhe Budapestit.
Sipas burimeve nga BE, eurodeputetët i kishin kërkuar atij detaje mbi firmën juridike që ka pasur para se të bëhej ministër.
