Presidenti Ilir Meta ka uruar me rastin e 90-vjetorit të lindjes, Kryepeshkopin e Shqipërisë Anastas Janullatos.
Përmes një statusi në ‘Facebook’, Meta shpreh mirënjohjen e veçantë për gjithçka ka bërë në këto vite për Lavdinë e Zotit, për të mirën e Kishës dhe besimtarëve ortodoksë shqiptarë.
Nga foto e publikuar vihet re se kreu i shtetit nuk ka nguruar t’i dhurojë Kryepeshkopit një tufë me trëndafila të bardhë.
“Me rastin e 90-vjetorit të lindjes, i urova sot jetë të gjatë, vite të bekuara dhe shumë dashuri në misionin e Tij hyjnor, Fortlumturisë së Tij Kryepeshkopit të Tiranës, Durrësit dhe gjithë Shqipërisë, Anastas Janullatos.
Mirënjohje e veçantë për gjithçka ka bërë në këto vite për Lavdinë e Zotit, për të mirën e Kishës dhe besimtarëve ortodoksë shqiptarë, për njohjen ndërkombëtarisht të saj dhe të Shqipërisë, për forcimin e harmonisë dhe mirëkuptimit mes besimeve në vendin tonë. Perëndia e bekoftë Fortlumturinë dhe veprën e Tij të ndritur”, shkruan Meta. Presidenti Meta në fakt i ka dhënë edhe shtetësinë shqiptare Janullatosit, çka ishte refuzuar nga Presidentët e mëparshëm duke e lënë kërkesën pa përgjigje.
Paradoksalisht, pas kësaj kërkese ka qëndruar vetë Greqia zyrtare, e cila në takime dypalëshe të të gjitha niveleve, madje dhe nëpërmjet miqve të huaj, e ka kërkuar këtë vendim. Kërkesë, që, në fakt, e kompromenton autoqefalinë dhe thekson ndjenjën e tutoratit, që Greqia ka dashur të vendosë gjithmonë kundrejt Kishës sonë dhe për të cilën kritikohet pikërisht kryepeshkopi.