Pak ditë më parë në një letër dërguar KED kreu i shtetit Ilir Meta kërkoi pezullimin e procedurave për zgjedhjen e anëtarëve të Kushtetueses, por kreu i grupit parlamentar te PS-se, Taulant Balla i është përgjigjur prerë këtë të shtunë në takimin e PS-s se të hënën do të votohen emrat në Kuvend.
“Është e vërtetë që në mes të tetorit të kaluar KE nuk arriti të merrte vendimin për çeljen e negociatave, por nuk duhet të jemi pesimiste. Qeveria jonë e drejtuar nga kryeministri Edi Rama i ka përmbushur të gjithë detyrimet që ka për fillimin e bisedimeve. Ne përmbyllim ditën e hënë fazën e parë të plotësimit të vakancave në gjykatën Kushtetuese, Kuvendi do të zgjedhë dy anëtarët e Kushtetueses të hënën. Për të mundësuar që deri në fund të janarit Kuvendi të ketë zgjedhur edhe anëtarin e tretë të gjykatës Kushtetuese që i takon Kuvendit të Shqipërisë. Ky është hap i rëndësishëm për të mundësuar që brenda pranverës ajo të jetë funksionale”-theksoi Balla.
Ndërkohë Balla tha se reforma zgjedhore do të përmbyllet brenda Krishtlindjeve, sipas rekomandimeve të OSBE-ODIHR.
“Do t’i kalojmë në kuvend për të qenë gati implementi i tyre për zgjedhjet e 2021. Duhet të ndryshojmë rregullat për financimin e partive politike”- Tha Balla, duke iu referuar zhvillimeve me te fundit, teksa tha se “Drejtësia sapo vërtetoi që një parti politike ka falsifikuar deklarimet sa i përket financimit e ky është një akt i rëndë që tregon se rregullat duhen forcuar që të mos lejojmë asnjë financim të huaj.”
