Lautaro Martinez vazhdon të tregojë formën e tij të jashtëzakonshme me Interin dhe ka ndihmuar këtë të fundit të sigurojë një fitore të rëndësishme 2-1 ndaj Spal, që i ka kthyer përsëri zikaltërit në kreun e renditjes së Serisë A. Golat e argjentinasi kanë qenë vendimtarë për këtë skuadër që sheh parakalimin e radhës ndaj Juventusit pas gafës që ky i fundit bëri në shtëpi.
Sulmuesi shënoi dy herë në portën e Berishës në pjesën e parë të ndeshjes, duke treguar të gjitha aftësitë si një nuhatës i jashtëzakonshëm i portës, fillimisht me kokë e pastaj me një diagonale të shkëlqyer. Por goli i Valotit në fillimin e pjesës së dytë hapi ndeshjen dhe bëri që për Interin të kishte drithërima deri në mbyllje të 90 minutave.
Ndërkaq, ka pasur festë edhe për Milanin, pasi kuqezinjtë kanë mundur 1-0 Parmën në transfertë. Një gafë e prapavijës së emilianëve, ku Dermaku nuk u aktivizua, solli golin e Hernandez në minutën e 89 të takimit dhe i dha tri pikët ekipit të Piolit.
Fitorja më e qetë ishte ajo e Lacios, që mundi 3-0 Udinezen falë dygolëshit të Imobile e pastaj penalltisë së Luis Albertos, të gjithë në pjesën e parë.