Ndeshja e sotme ndaj Sampdorias ka qenë historike për Xhanluixhi Bufon, portierin e Juventusit. Dëmtimi i Vojiçeç Shçzesnji ka bërë që ai të jetë titullar në kampionat ndaj Sampdorias e kjo i ka mundësuar që të shkruajë emrin e tij në librat e historisë së futbollit italian.
Kjo ishte ndeshja e 647 e tij në Serinë A, duke barazuar në vendin e parë të të gjitha kohëve një legjendë si ish-kapiteni i Milanit, Paolo Maldini, me parakalimin që praktikisht do të jetë çështje javësh.
Por jo vetëm kaq, tani Bufon është rekordmeni sa i përket skuadrës së Juventusit, pasi ka regjistruar me të 479 ndeshje në fushë, duke u bërë lojtari që ka veshur më shpesh fanellën e bardhezinjve në Serinë A. Ai kalon kësisoj atë që mbante këtë rekord, një tjetër legjendë të futbollit italian, Alesandro Del Pieron. Megjithatë, ky i fundit mbetet ende para sa i përket ndeshje zyrtare në të gjitha kompeticionet, pasi ka luajtur 705 të tilla me Juventusin, ndaj 664 të Bufon.