Ambasadori meksikan me detyrë në Argjentinë ka dhënë dorëheqjen, pasi është filmuar nga kamerat e sigurisë të një librarie në Buenos Aires duke vjedhur një libër.
77 vjeçari Ricardo Valero, u thirr në zyrë menjëherë nga Ministri i Punëve të Jashtme të Meksikës pasi mediat publikuan pamjet.
Në pamjet e publikuara në media, shihet ambasadori teksa merr librin e fut mes gazetës dhe largohet. Sipas mediave të huaja, libri mendohet se është një biografi e Giacomo Casanova-s, një autori, spiuni dhe playboy të shekullit të 18-të.
Qeveria pranoi dorëheqjen e Valeros të dielën, pasi u akuzua edhe për një vjedhje tjetër. Kësaj here ai mori një bluzë nga një dyqan në një aeroport. Ministri Marcelo Ebrard i uroi diplomatit shërim të shpejtë. Ndërkohë, mediet raportojnë se ai i ka mbijetuar një tumori në tru 6 vite më parë dhe gjendja e tij ka qenë gjithnjë nën monitorim.