Në Serinë A të këtij sezoni janë të shumtë shqiptarët që janë kthyer në protagonistë. Nga Strakosha me Lacion, Berisha te SPAL, Gjimshiti me Atalantën dhe Rrahmani me Kumbullën te Verona. Kjo vërtetohet nëpërmjet shumë statistikave, ndërsa së fundmi ata që kanë marrë vëmendjen janë Rrahmani dhe Gjimshiti.
Serie A ka publikuar listën me 15 futbollistët që kanë rikuperuar më shumë herë topin deri në këtë pjesë të sezonit. Në vendin e pestë të këtij klasifikimi gjendet Berat Gjimshiti me 245 topa të rikuperuar, duke u konfirmuar si një nga futbollistët më të rëndësishëm të Atalantës, ndërsa ka lënë pas edhe shokun e tij të skuadrës Palomino.
Ndërkohë, në kryesim gjejmë një tjetër shqiptar. Bëhet fjalë për Amir Rrahmanin i cili ia ka dalë të rikuperojë sferën në 271 raste. Dhe jo më kot, mbrojtësi është zyrtarizuar si lojtari më i ri i Napolit, teksa do i bashkohet të kaltërve vetëm në verë.
