Ministri i Jashtëm i Kosovës, Glauk Konjufca ka shkarkuar disa ambasadorë të Kosovës mes të cilëve dhe atë në SHBA, Vlora Çitaku. Ai e ka argumentuar me faktin se ata e kanë përfunduar afatin 4-vjeçar që parashikohet në ligj.
Kujtojmë që Çitaku u vu në qendër të medias pak kohë më parë për shkak të gabimit për njohjen e Kosovës nga shteti i Xhamajkës.
REAGIMI I PLOTË
Që në fillim të mandatit jam zotuar për vendosjen e rregullit dhe ligjit në Ministrinë e Punëve të Jashtme dhe Diasporës. Një ndër hapat e radhës është edhe kërkesa për kthimin e ambasadorëve politik që e kanë përfunduar mandatin 4 vjeçar të paraparë sipas ligjeve në fuqi të Republikës se Kosovës. Duke u bazuar në nenin 93, pika 8 dhe nenin 84 pika 25 të Kushtetutës së Republikës së Kosovës, si dhe nenin 13 të Ligjit nr.03/L-122 për Shërbimin e Jashtëm të Republikës së Kosovës (GZ. Nr 46/15 janar 2009) dhe bazuar në nenin 10 (paragrafi 9) të Rregullores për Shërbimin e Jashtëm dhe me qëllim të respektimit të nenit 7,7 të Ligjit Nr.03/L-207 për ndryshimin dhe plotësimin e Ligjit Nr.03/L-044 për Ministrinë e Punëve të Jashtme dhe Shërbimin Diplomatik të Republikës së Kosovës,( GZ.76, 10 gusht 2010), në emër të Qeverisë së Republikës së Kosovës, propozoj tërheqjen nga misioni të këtyre ambasadorëve politik.
Këta janë ambasadorët e shkarkuar nga Konjufca: Vlora Çitaku; Edon Cana; Lirim Grejçevci; Shpend Kallaba; Mimoza Ahmetaj; Ylber Hysa dhe Ramadan Avdiu