Eksperienca e Murinjos te Totenhem ka nisur të marrë tatëpjetën. Modestët e Noruiç arritën t’i merrnin një barazim në kohën e rregullt e më pas të fitonin me penallti për të arritur të eliminojnë skuadrën e “Spurs” dhe të kalojnë në çerekfinalet e Kupës së Anglisë , ku do të ndeshen me fituesin e çiftit Derbi-Mançester Junajtid. Përtej kësaj gjatë ndeshjes ka ndodhur një episod tepër i rrallë.
Në fund të sfidës kamerat kanë pikasur Erik Dajer, i cili vrapon të ngjitet në tribunë dhe shkon të përleshet me një tifoz të Totenhem. Në momentin që ai po debatonte me tifozin u krijua një kaos i madh dhe u desh ndërhyrja e forcave të sigurisë për të qetësuar gjendjen. Në një nga videot e shumta të publikuara dëgjohet Dajer teksa i thotë një tifozi: “Hej, ai është vëllai im”.
Pas kësaj forcat e sigurisë e shoqërojnë në fushë Dajer dhe situata i kthehet normalitetit. Aludimeve të shumta për shkakun se përse lojtari shkoi të bënte atë veprim të pazakontë u ka dhënë fund Murinjo. “Dajer bëri një veprim aspak të hijshëm nga një profesionist, por nëse dikush ju fyen dhe aty është e përfshirë edhe familja, veçanërisht vëllai, atëherë. Ai bëri diçka të gabuar, por nëse klubi do e dënonte, nuk do të isha dakord”, u shpreh trajneri i Totenhem.