Në kurbën e rritjes së infektimit nga koronavirusi, masat shtrënguese të marra nga Shqipëria kanë dhënë efektin e tyre, pasi rritja e të infektuarve është mbajtur në kushte të menaxhueshme nga sistemi shëndetësor.
Kurba tregon rritjen që bën ‘armiku i padukshëm’ në luftë me jetën njerëzore pas 20 rasteve të para të konfirmuara dhe ajo që vihet re është se Shqipëria ndodhen në nivele normale të kurbës, krahasuar me vendet e tjera që kanë një rritje shumë të lartë, edhe pse kanë një sistem shëndetësor shumë më të zhvilluar dhe modern krahasuar me tonin.
Këto shifra janë bërë publike nga kryeministri Rama, i cili tha se ky është efekti i masave të marra në mënyrë të menjëhershme dhe rezistencës fantastike të 99% të shqiptarëve deri tani.
Rama, ashtu siç ka paralajmëruar edhe më herët, koronavirusi do të ketë ngritje por që të gjithë po punojnë që ajo të jetë e butë dhe të shpëtojmë Shqipërinë nga katastrofa.
“Kjo do të vij nga rezistenca jonë dhe jo të lëshohemi në krahët e frikës se “do vdesim për bukë”, që pastaj kjo shigjeta e kuqe të iki lart si raketë dhe ne të biem në këmbët e armikut duke numëruar qindra e mijëra të vdekur”, tha Rama duke thënë se çdo gjë është në dorën e vetë shqiptarëve.