Shtatë ditë pasi avioni me të cilin ai udhëtonte u zhduk, shpresat për gjetjen e futbollistit Emiliano Sala nuk janë shuar. Bashkë me të ka humbur edhe piloti i mjetit fluturues. Familja po bën çmos të gjejë trupin e humbur të lojtarit të ri të Cardiff City.
Ata të dëshpëruar kanë kërkuar ndihmën e një eksperti detar. Britanikja The Mirror shkruan se shkencëtari detar David Mearns ka që të dielën që me anë të një makinerie të vogël me helikë po mundohet ta gjejë avionin e rënë në ishullin Guernsey.
Hamendësohet se avioni ka rënë pikërisht në atë zonë, teksa ishte rrugës nga Nantes në Cardiff. Përveç Sala, në avion ishte edhe piloti anglez Dave Ibbotson. Mearns është një ekspert i kërkimit të anijeve të mbytura dhe sjell me vete teknikë komplekse të ndihmuar nga teknologjia.
Aktualisht ai është duke kërkuar në grupimin e ishujve që njihet si Casquets Island dhe është rreth 13 kilometra larg Alderney. Thellësia është rreth 60 metra. Ndër të tjera, ekspertët janë duke përdorur një automjet nënujor që është i pajisur me kamera, i specializuar për të gjetur mbeturina anijesh. Ka qenë familja që arriti të financonte këtë kërkim me anë të një peticioni online, ku kanë kontribuar edhe shumë yje të futbollit europian.