Kur ai debutoi në 2007 në Vlorë, vetëm 17-vjeç, të gjithë thanë se një yll i ri po ngrihej në futbollin shqiptar. Deri në vitin 2012 u bë një ndër personazhet e Superiores. Supertalent, adoleshent, me të dhëna fantastike dhe titullar te Flamurtari, kandidat për kombëtare. Te Shpresat, Shpëtim Moçka luajti shumë ndeshje, por në kombëtaren A nuk luajti asnjë ndeshje zyrtare, duke u grumbulluar vetëm për ndonjë miqësore.
Më pas, në moshën 23-vjeçare, Moçka e pa veten jashtë Flamurtarit. U konsiderua i panevojshëm dhe u largua tek Apolonia, më pas shkoi te Kastrioti dhe u kthye në Vlorë në sezonin 2013/14. Një vit në formacion, por kur u duk se rigjeti vendin që i takonte, sërish largim.
Nga Flamurtari, në mënyrë të bujshme, Moçka shkoi te Mamurrasi në Kategorinë e Parë, klub i çuditshëm, që tashmë nuk ekziston më. Ishte pjesa e parë e sezonit 2014/15, pika më e ulët në karrierën e një portieri që shihej si pasardhësi i Arian Beqajt në kombëtare, kur nisi karrierën.
Më pas te Laçi dhe për 3 sezone rresht tek Teuta, ku u bë si i shtëpisë, por edhe aty në sezonin e fundit luajti vetëm gjysmat e ndeshjeve (u bë hero, duke shënuar golin e barazimit në një ndeshje shumë të rëndësishme kundër Partizanit) dhe verën e shkuar shkoi te Tirana.
Në teori duhej të luftonte me Ilion Likën për vendin në formacion, por i kaloi në hierarki Alesio Abibi dhe Moçka përfundoi jashtë planeve të klubit.
Tani, në moshën 29-vjeçare, Moçka transferohet në Ballsh, me shpresën se do të luajë rregullisht dhe do të rikthehet në Superiore, pasi është ende shumë i ri dhe ka edhe shumë vite karrierë përpara.
