Nevil Dede përfaqëson një pjesë të historisë së Tiranës. Ish-mbrojtësi ka bërë epokë me bardheblutë duke fituar çdo titull të mundshëm brenda vendit dhe zhvilluar ndeshje të mira në Europë. Dede është trajner i kombëtares U-19, ku së fundmi ftoi në një prej talenteve më të spikatur, Armando Dobrën. Në një intervistë për “Super Sport”, tekniku flet për djaloshin nga Burreli dhe ekipin bardheblu.
“Kam pasur fat që kam luajtur te Tirana. Nuk janë vetëm meritat e mia, por edhe të klubit e për këtë jam krenar që kam luajtur aty. Vrapi dhe Osmani shkuan në Kombëtare edhe falë meje dhe kujtoj një batutë të Bejzades. I tha trajnerit Daja që të luante në mbrojtje me mua që të shkonte në Kombëtare.
Unë jam pjesë e Tiranës sepse kam bërë histori me këtë klub. Është shtëpia ime, pasi jam rritur aty dhe jam formuar si lojtar dhe si njeri. Mezi pres që të shpallen kampion dhe unë flas si tifoz, pasi kam lidhje shpirtërore. Unë i kam ndjekur të gjithë lojtarët dhe pardje fola me Dobrën. Edhe ata kanë qenë të mbyllur si ne.
Shumë lojtarë janë munduar të mbajnë veten në formë me aq sa kishin mundësi. Ka filluar stërvitja prej 10 ditësh dhe është pak situatë e vështirë duke parë ritmin e ndeshjeve dhe aty mund të kenë probleme lojtarët. Mos harrojmë që është bërë një ndryshim dhe do të ketë 5 zëvendësime që është një gjë pozitive”, përfundoi Dede.
