Napoli ka fituar sot Kupën e Italisë përballë Juventusit në një ndeshje që do të kujtohet gjatë për mënyrën se si u zhvillua ky turne pas rifillimit të aktivitetit të ndalur si pasojë e pandemisë, por edhe për faktin se ktheu këtë trofe te skuadra e Hysajt pas 6 vitesh.
Ashtu sic pritej, ndeshja mes dy skuadrave u luajt me një ritëm jo edhe aq të lartë, pasi dukej qartësisht lodhja e pak ditëve më parë nga ndeshjet gjysmëfinale. Të dy ekipet krijuan raste, por Napoli iu afrua më shumë golit duke prekur dy herë shtyllën e Bufon, fillimisht me Insinje e pastaj me Elmas në fundin e sfidës. Por me vërshëllimën përfundimtare të 90 minutave, të dy skuadrat e panë veten me rrjeta të paprekura dhe sipas rregullave të reja të kompeticionit, nuk u zhvilluan kohët shtesë dhe u shkua direkt te gjuajtjet e penalltive.
Aty Napoli ishte i pagabueshëm me goditjet e sakta të Insinje, Politano, Maksimoviç dhe Milik. Ndërsa nga ana tjetër, Juventusi duhet të fillojë të mendojë si të përgatitë gjuajtësit e penalltive pasi gabimet radhazi në fillim të Dibala dhe Danilo i kushtuan shumë shtrenjtë, ndërsa golat e Bonuçit dhe Ramseit ishin thjesht për statistikë.
Kësisoj, Napoli ka kryer edhe një hakmarrje të vogël ndaj Mauricio Sarrit, të cilit i rrëmbeu nga duart atë që do të kishte qenë trofeu i parë si trajner në Itali i teknikut të bardhezinjve.
NAPOLI-JUVENTUS 0-0 (4-2 me penallti)
Napoli: Meret; Di Lorenco, Maksimoviç, Kulibali, Mario Rui; Fabian Ruiz, Deme, Zielinski; Kajehon, Mertens, Insinje.
Trajner: Xh. Gatuzo
Juventus: Bufon, Kuadrado, De Ligt, Bonuçi, Aleks Sandro, Bentakur, Pjaniç, Matuidi, Duglas Kosta, Dibala, Kristiano Ronaldo
Trajner: M. Sarri