Në shtator kombëtarja jonë do të nisë rrugëtimin e dytë në Ligën e Kombeve. Kuqezinjtë janë në Grupin 4 të këtij kompeticioni dhe kundër kanë Kazakistanin, Bjellorusinë dhe Lituaninë. Pikërisht me këta në fundit ka ndodhur një ndryshim planesh në lidhje me orarin e ndeshjes së dytë mes tyre dhe kombëtares sonë.
Lituania fillimisht kishte rënë dakort me Federatën tonë dhe më pas ka gjetur edhe aprovimin e UEFA-s për të ndryshuar orarin e ndeshjes me Shqipërinë në vendin e tyre më datë 14 tetor të këtij viti. Kjo përballje ishte planifikuar të luhej në 20:45, por tani gjithçka është anuluar dhe orari i ri i konfirmuar është 18:00.
Kombëtarja jonë, ndryshe nga edicioni i shkuar do të provojë të bëjë një figurë të mirë këtë fushatë në Ligën e Kombeve. Ky kompeticion do të jetë edhe një përgatitje e mirë për Rejën dhe djemtë e tij, para nisjes së eliminatoreve të Botërorit 2022, që do zhvillohet në Katar.